20

മലയാള സിനിമയിലേക്ക് ശ്രദ്ധേയമായ ഒരു കാൽവെപ്പിനൊരുങ്ങുകയാണ് പ്രശസ്ത നടി ബിന്ദു പണിക്കരുടെ മകൾ കല്യാണി പണിക്കർ. 'മധുവിധു' എന്ന ചിത്രത്തിലൂടെ നായികയായി അരങ്ങേറുന്ന താരം, സിനിമയിലേക്കുള്ള തന്‍റെ പ്രവേശനത്തിന് മുൻപേ തന്നെ സോഷ്യൽ മീഡിയയിലെ നൃത്തത്തിലൂടെയും റീലുകളിലൂടെയും പ്രേക്ഷകർക്ക് സുപരിചിതയാണ്.

തന്‍റെ കരിയറിലെ വിശേഷങ്ങൾ പങ്കുവെക്കുന്നതിനിടെ അമ്മയെക്കുറിച്ച് കല്യാണി പറഞ്ഞ രസകരമായ കാര്യങ്ങളാണ് ഇപ്പോൾ ചർച്ചയാകുന്നത്. മമ്മൂട്ടി നായകനായ 'ടർബോ' എന്ന ചിത്രത്തിൽ ബിന്ദു പണിക്കർ അഭിനയിച്ചപ്പോഴുണ്ടായ അനുഭവത്തെക്കുറിച്ചാണ് കല്യാണി വെളിപ്പെടുത്തിയത്.

വാഹനങ്ങളുടെ വേഗതയോട് വലിയ ഭയമുള്ള ബിന്ദു പണിക്കർക്ക്, ചിത്രീകരണത്തിനിടെ മമ്മൂട്ടിക്കൊപ്പം അതിവേഗത്തിൽ യാത്ര ചെയ്യേണ്ടി വന്നത് വലിയ വെല്ലുവിളിയായിരുന്നു.

സാധാരണഗതിയിൽ തനിക്കൊപ്പം യാത്ര ചെയ്യുമ്പോൾ പോലും 40 കിലോമീറ്ററിൽ കൂടുതൽ വേഗത അമ്മയ്ക്ക് സഹിക്കാനാവില്ലെന്നും കല്യാണി പറയുന്നു.

ടർബോയുടെ ലൊക്കേഷനിൽ മമ്മൂട്ടിയാണ് വാഹനം ഓടിക്കുന്നതെന്ന് കേട്ടാൽ ഷൂട്ടിങ്ങിന് വരാൻ വരെ ബിന്ദു പണിക്കർ മടിച്ചിരുന്നതായി മകൾ തമാശയോടെ ഓർക്കുന്നു. "ഇന്ന് മമ്മൂക്കയാണോ വണ്ടി ഓടിക്കുന്നത്?" എന്ന് രാത്രിയിൽ സെറ്റിലേക്ക് വിളിച്ച് തിരക്കുമായിരുന്നു.

ആണെന്ന് അറിഞ്ഞാൽ എങ്ങോട്ടെങ്കിലും ഒളിച്ചോടിപ്പോകുമെന്ന് പറയുന്നത്രയും പരിഭ്രാന്തിയായിരുന്നു അമ്മയ്ക്കെന്നും കല്യാണി ഒരു അഭിമുഖത്തിൽ വ്യക്തമാക്കി.

ബിബിൻ മോഹനും ജയ് വിഷ്ണുവും ചേർന്ന് തിരക്കഥയൊരുക്കുന്ന 'മധുവിധു' ഒരു സമ്പൂർണ കുടുംബ വിനോദ ചിത്രമായിരിക്കും എന്ന സൂചനയാണ് ലഭിക്കുന്നത്.

ജഗദീഷ്, സായ്കുമാർ, അസീസ് നെടുമങ്ങാട് തുടങ്ങി പ്രമുഖ താരനിര അണിനിരക്കുന്ന ഈ ചിത്രം അജിത് വിനായക ഫിലിംസാണ് വിതരണത്തിന് എത്തിക്കുന്നത്.

ഗഗനചാരി, പൊന്മാൻ തുടങ്ങിയ ചിത്രങ്ങളിലൂടെ ശ്രദ്ധേയരായ നിർമ്മാണ കമ്പനിയുടെ പുതിയ ചിത്രം കൂടിയാണിത്. 'ഷൈലോക്ക്', 'മധുര മനോഹര മോഹം' തുടങ്ങിയ സിനിമകളുടെ രചയിതാക്കളിൽ നിന്നുള്ള ഈ പുതിയ സംരംഭം ഏറെ പ്രതീക്ഷയോടെയാണ് സിനിമാലോകം കാത്തിരിക്കുന്നത്.